အကယ်ဒမီအတွက် ရင်ခုန်နေကြသူတွေအတွက် သတင်းကောင်း ပါပဲဆိုတဲ့ ဒေါ်ဝါဝါဝင်းရွှေ

အကယ်ဒမီအတွက် ရင်ခုန်နေကြသူတွေအတွက် သတင်းကောင်းပေါ့။

အကယ်ဒမီဆု ရွေးချယ်ရေး အကဲဖြတ်အဖွဲ့ ဥက္ကဋ္ဌဖြစ်တဲ့ ဒေါ်ဝါဝါဝင်းရွှေက အကယ်ဒမီနဲ့ ပတ်သက်ပြီး ပရိသတ်ဝမ်းသာရမယ့် စကားတစ်ခွန်းကို Media ကို အခုလို ပြောပြခဲ့ပါတယ်။

“၁၀၀ ရာခိုင်နှုန်း မပြည့်တောင်မှ ပရိသတ်နဲ့ ထပ်တူထပ်မျှ ၇၅ လောက်တော့ ပြည့်ပြီးတော့ အားလုံး ဝမ်းသာကြမှာပါ” လို့ အကယ်ဒမီများရှင် ဒေါ်ဝါဝါဝင်းရွှေက ပြောပါတယ်။

တကယ့်ကို စေတနာအရင်းခံနဲ့ ရသင့်တဲ့အနုပညာရှင်တွေ မှန်မှန်ကန်ကန် ရကြပါစေဆိုတဲ့ စေတနာနဲ့ ပင်ပင်ပန်းပန်းနဲ့ အကယ်ဒမီဆုအတွက် အကဲဖြတ်ပေးနေတဲ့လို့လည်း အန်တီဝါက ပြောပြခဲ့ပါတယ်။ အကယ်ဒမီ အကဲဖြတ်ဖို့အတွက် တစ်နေ့ကို ရုပ်ရှင် နှစ်ကားနှုန်းနဲ့ ကြည့်လာတာ နှစ်လရှိပြီလို့လည်း သိရပါတယ်။ ဇာတ်ကားတိုင်းကို ထပ်တလဲလဲလည်း ကြည့်ရတယ်လို့ ဆိုပါတယ်။

“ဇာတ်ကားပေါင်းများစွာ အန်တီဝါတို့ကြည့်ပါတယ်။ ၅၃ ကား။ အနုပညာရှင်ပိုင်းရော အတတ်ပညာရှင်ပိုင်းရော အကုန်ကြည့်ကြတယ်။ ဒီနှစ် ကားကောင်းတွေ အရမ်းများပါတယ်” လို့လည်း အန်တီဝါက ဆိုပါတယ်။

အကယ်ဒမီပေးပွဲကို ၂၀၁၈ ခုနှစ် မတ်လ ၂၃ ရက်နေ့မှာ ရန်ကုန်မြို့ရှိ Myanmar Event Park မှာ ကျင်းပမှာ ဖြစ်ပြီး စုစုပေါင်း အကယ်ဒမီ ၁၂ ဆု ချီးမြှင့်မယ်လို့ သိရပါတယ်။

ဆုအမည်တွေကတော့ ၁။ တေးဂီတဆု၊ ၂။ တည်းဖြတ်ဆု၊ ၃။ အသံဆု၊ ၄။ ဒါရိုက်တာဆု၊ ၅။ မီးအလင်းအမှောင်ဆု၊ ၆။ ဇာတ်ကားဆု၊ ၇။ ဇာတ်ညွှန်းဆု၊ ၈။ အမျိုးသားဇာတ်ဆောင်ဆု၊ ၉။ အမျိုးသားဇာတ်ပို့ဆု၊ ၁၀။ အမျိုးသမီးဇာတ်ပို့ဆု၊ ၁၁။ အမျိုးသမီးဇာတ်ဆောင်ဆု၊ ၁၂။ အထူးဆု တို့ ဖြစ်ပါတယ်။

တစ်နှစ်တစ်ကြိမ် ကျင်းပတဲ့ မြန်မာ့ရုပ်ရှင်ထူးချွန်ဆု (အကယ်ဒမီ) ဆုပေးပွဲအခမ်းအနားကို ၁၉၅၂ ခုနှစ်ကစပြီး ကျင်းပခဲ့တာ ဖြစ်ပါတယ်။ ထူးချွန်ဆုရရှိသူ တစ်ဦးချင်းကို အကယ်ဒမီ ရွှေစင်ရုပ်တုနဲ့ ငွေသားဆု ချီးမြှင့်ပါတယ်။

ရွှေစင်ရုပ်တုရဲ့ထိပ်မှာပါတဲ့ ကြယ်ပွင့်ကို ယခင်နှစ်တွေမှာ ရွှေသားစစ်စစ် ၂ ကျပ်သားနဲ့ ပြုလုပ်ခဲ့တာဖြစ်ပေမဲ့ ဒီနှစ်မှာတော့ ရွှေသား ၅ ကျပ်သားနဲ့ ပြုလုပ် ချီးမြှင့်မယ်လို့လည်း သိရပါတယ်။

နောက်ထပ် ထူးခြားအစီအစဉ်သစ်တစ်ခုကတော့ တစ်သက်တာ ရုပ်ရှင်ထူးချွန်ဆု ချီးမြှင့်မယ့် အစီအစဉ် ဖြစ်ပါတယ်။ တစ်သက်တာရုပ်ရှင်ထူးချွန်ဆု ရရှိသူက အကယ်ဒမီရွှေစင်ရုပ်တုအပြင် သက်ရှိထင်ရှားရှိနေစဉ် ကာလတစ်လျှောက်မှာ လစဉ်ချီးမြှင့်ငွေ ကျပ်(၅)သိန်း ပါ ချီးမြှင့်သွားမှာ ဖြစ်တယ်လို့ ရုပ်ရှင်အစည်းအရုံး ဥက္ကဌ ဦးဇင်ဝိုင်းက ပြောပါတယ်။

ရုပ်ရှင်မင်းသားကြီး ဦးညွှန့်ဝင်းက လက်ရှိအချိန်ထိ အကယ်ဒမီဆု (၇)ဆုနဲ့ အကယ်ဒမီ အများဆုံးဆုရှင် မင်းသားကြီး ဖြစ်ပါတယ်။ ဒါရိုက်တာ ဦးသုခ၊ သရုပ်ဆောင် ရန်အောင်၊ ဦးသန်းညွှန့်တို့က အကယ်ဒမီဆု(၆)ဆုရရှိထားပြီး မြင့်မြင့်ခင်၊ မောင်တင်ဦး၊ ကျော်ဟိန်း၊ မို့မို့မြင့်အောင်၊ ကြည်စိုးထွန်းနဲ့ မေသန်းနုတို့ကတော့ အကယ်ဒမီ (၅)ဆုစီ ရရှိထားကြတယ်လို့ သိရပါတယ်။

FROM@duwun